نزعل ونتكبّر وحنا من الطين=والكل منا صدّ لا أقبل خويّه
نفخر نقول إنا على الصد قاوين=وهيّ علينا في الحقيقـة قويه
نشفق على الطيبة وكسب الكريمين=وهذي بنا لاشك فعلة رديه
ننسى نهايتنا وعلى وين ماشين=وننسى الزمان اللي جمعنا سويه
المشكلة ماهي بـ حاجة لــ تخمين=ولاهي بعد ياناس صعب القضيه
دق الرقم : كيفك هلا فيك وأهليـن=أنا الخوي اللي مزعّل خويه
قلّه : تغيب وصورتك داخل العين=ويبقى لـ قدرك في خفوقي بقيه
أخوان حنا لو يجي بيننا شين=ومانفترق دام المعزه نديه
خلك قوي لاتحتكرك الشياطين=قبل الفوات وقبل وقت المنيه
كلّم خويك بـــ اطيب الهرج واللين=وأعرف جميل الهرج يمسـح رديه
هذي هي الدنيا من الحين لـ الحين=لابد بين الناس تحصل خطيه
ومن لا يقدر غلطة أصحابه الحيـن=يقرأ حروفي ويعتبرها هديه
باكر تمر سنين وسنين وسنين=والكل يرحل في الدروب المديه
صدقني تندم وأذكر حروفنا زين=على ابن عمك إذا غاب ضيّه
دنيا غريبة وأكثر الناس ماشين=وكم واحدٍ والله إدفنته يديه