• ×

09:21 مساءً , الأحد 5 ربيع الأول 1438 / 4 ديسمبر 2016

◄ مكتبة منهل الثقافة التربوية : المنهل اللغوي (قسم الثقافة الشعرية ـ همس القوافي وبوح الخواطر) (قصيدة شعرية ـ حمد البريدي).
أبي يقول أسمع وصاتي وأنا أبيك=عشر وصايا قادحه من شراره
من تجربه الدنيا وجردن مهاليك=لقا بها الافراح عقب المراره
الاوله طيب النبا في ملاقيك=حافظ عليه ولا تنقص عياره
لاتغض عينك لاتكلم محاكيك=عطه على جوه وقدر وقاره
والثانيه من جاك زابن وناصيك=قله احرست ودارك تصير داره
وان صاح ابن عمك فلا تقول وشفيك=افزع معه واصمد على كل غاره
والثالثه خوة اهل الطيب تغنيك=والا ضعيفين الروابع خساره
ومن يضحك بوجهك وهو مايدانيك=كبه وخله يحترق وسط ناره
والرابعه لاحزت نصرك بأياديك=اقنع بنصرك لاتعاود مساره
لاتومي بنفسك بدرب المهاليك=مشين على الرجال كون انكساره
والخامسه خابرك وأنا مربيك=ماينفعك كثر اللعب والدواره
قلط ربوعك مجلسك يوم تأتيك=وخل الدخون يدور داير مداره
والسادسه رفيقك اللي يخاويك=سافر معه وتعرف ماكر حراره
اما رفيقن في مماشيه يحيك=والا فغير وجهتك عن مساره
والسابعه سرك يميتك ويحييك=عليك بالكتمان تاره وتاره
افشاء سرك عند من لايراعيك=مايرفع البنيان عقب انهياره
والثامنه من قبل لا اقول واوصيك=لا خير في جارن مايحب جاره
جارك عطه روحك وما تملك ايديك=ركد له الدله وشب المناره
والتاسعه لو يغلط بحقك اخيك=خذها بشحم وارفع مع الناس كاره
علمه ترى علمك وطاريه طاريك=عليك به لو كان ماله جداره
والعاشره حب الهوى جعل مايجيك=وان جاك فاالطف به وصونه وداره
يومن بيضحك بك ويومن بيبكيك=وياعزتي لك لاتعدى الستاره
واللي عن العشر الوصايا بيغنيك=عمود دين ونور درب ومناره
ترى الصلاه وبس هي من تنجيك=واللي ماهو يصلي حياته خساره

 0  0  2108
التعليقات ( 0 )


منهل الثقافة التربوية مسجل لدى خدمة (معروف ـ وزارة التجارة والاستثمار ـ المملكة العربية السعودية) للتعريف بالمنصات الإلكترونية وتسجيل المرجعية الرسمية لها ..
جميع الأوقات بتوقيت جرينتش +3 ساعات. الوقت الآن هو 09:21 مساءً الأحد 5 ربيع الأول 1438 / 4 ديسمبر 2016.

Powered by Dimofinf cms Version 4.0.0
Copyright© Dimensions Of Information Ltd.