من أحدث المقالات المضافة إلى القسم.

بسم الله الرحمن الرحيم

اسمُ الكاتب : د. خالد محمد الصحفي.
إجمالي القراءات : ﴿12182﴾.
عدد المشــاركات : ﴿105﴾.

قصيدة : عشر وصايا // الشاعر : حمد البريدي.
أبي يقول أسمع وصاتي وأنا أبيك=عشر وصايا قادحه من شراره
من تجربه الدنيا وجردن مهاليك=لقا بها الأفراح عقب المراره
ألأوله طيب النبأ في ملاقيك=حافظ عليه ولا تنقص عياره
لا تغض عينك لا تكلم محاكيك=عطه على جوه وقدر وقاره
والثانية من جاك زابن وناصيك=قله احرست ودارك تصير داره
وان صاح ابن عمك فلا تقول وشفيك=افزع معه واصمد على كل غاره
والثالثة خوة أهل الطيب تغنيك=وإلا ضعيفين الروابع خساره
ومن يضحك بوجهك وهو ما يدانيك=كبه وخله يحترق وسط ناره
والرابعة لاحزت نصرك بأياديك=اقنع بنصرك لا تعاود مساره
لا تومي بنفسك بدرب المهاليك=مشين على الرجال كون انكساره
والخامسة خابرك وأنا مربيك=ما ينفعك كثر اللعب والدواره
قلط ربوعك مجلسك يوم تأتيك=وخل الدخون يدور داير مداره
والسادسة رفيقك اللي يخاويك=سافر معه وتعرف ماكر حراره
أما رفيقن في مماشيه يحيك=وإلا فغير وجهتك عن مساره
والسابعة سرك يميتك ويحييك=عليك بالكتمان تاره وتاره
إفشاء سرك عند من لا يراعيك=ما يرفع البنيان عقب انهياره
والثامنة من قبل لا أقول وأوصيك=لا خير في جارن ما يحب جاره
جارك عطه روحك وما تملك أيديك=ركد له الدله وشب المناره
والتاسعة لو يغلط بحقك أخيك=خذها بشحم وارفع مع الناس كاره
علمه ترى علمك وطاريه طاريك=عليك به لو كان ماله جداره
والعاشرة حب الهوى جعل ما يجيك=وان جاك فا الطف به وصونه وداره
يومن بيضحك بك ويومن بيبكيك=ويا عزتي لك لا تعدى الستاره
واللي عن العشر الوصايا بيغنيك=عمود دين ونور درب ومناره
ترى الصلاة وبس هي من تنجيك=واللي ماهو يصلي حياته خساره